El Guateque de Vitorina cierra’l so cartel
Yo Somos + Zahira & Los Rodríguez del Límite + Stanley Brinks & Freschard + Maribel & Sebastian xúnense a los nomes yá anunciaos:Dear Joanne + Natalia Ferviú + La Viuda de Angelín
Oferta de camping nel Camping Municipal de Sobrescobio
Una xornada pa bailar, comer, brindar y celebrar que n’Asturies too ta más cerca de lo que paez.
Sábadu 30 de mayu de 2026
La Pomarada · El Condao · Llaviana
Dende les 13:00 hores
Entraes yá a la venta
El vermú que conmocionó Asturies
Hai coses que nun se miden en quilómetros. Mídense en identidá. En memoria. Enes ganes de xuntase. Nesa sensación de saber que la costa, la cuenca, la ciudá y el pueblu formen parte de la mesma historia. Esti 30 de mayu, Gijón Sound Festival alcuéntrase con El Guateque de Vitorina pa celebrar una unión especial: El Condao feat. Xixón. La costa abraza l’interior. La ciudá y la cuenca dánse un besu. Lo urbano y lo rural dexen de mirase de lloñe pa convertise en best friends por un día. Y el llugar nun podía ser otru.
La Pomarada: 75 años d’historia viva
La Pomarada, n’El Condao, nun ye namás un restorán.
Ye una institución emocional del Alto Nalón. Una segunda casa pa munches persones. Un sitiu onde se celebró, se comió, se bailó, se brindó, se lloró, se namoró y se volvió una y otra vez.
Fundada hai más de siete décades por Esmeralda y Eladio, empezó como tienda-bar de pueblu, convirtióse en casa de comíes icónica y acabó siendo un referente gastronómicu de la zona.
La so menestra ye historia viva. Les sos paredes son memoria colectiva. Y baxo’l mandu de Vitorina y el so fíu Adauto, La Pomarada sigue recibiendo a la xente como se reciben les coses importantes: coles puertes abiertes y los brazos más abiertos entá.
Nos años 70 tamién foi discoteca. Güei vuelve sonar la música.
Pero esto nun ye nostalxa.
Ye patrimoniu social en movimientu.
El Condao: onde la historia respira
A cinco quilómetros de Pola de Llaviana, ente’l Xerra y el Nalón, El Condao ye ún d’esos llugares onde la historia nun ta guardada nun llibru: ta na cai, nel paisaxe y na xente.
El Torreón medieval mira dende’l sieglu XIV. Los hórreos falen d’economía agraria. La minería y la industrialización marcaron xeneraciones. Y güei, ente memoria obrera, naturaleza y comunidá, tamién hai espaciu pal presente y pal futuru.
Por eso esti alcuentru importa.
Porque nun trai cultura “al pueblu” como si’l pueblu tuviera vacíu. Trai cultura a un sitiu que yá ye cultura.
El Guateque de Vitorina nació hai apenes un añu d’un suañu compartíu ente Álex del Argayu Fest y Fee Reega, d’Ajá Rioseco:
activar un espaciu únicu y crear una opción d’ociu potente nel Alto Nalón.
Pero en mui poco tiempu convirtióse en daqué más qu’una fiesta.
Ye una prueba de que la música contemporánea pue vivir n’espacios tradicionales ensin quita-yos l’alma. Ye una forma de xuntar xeneraciones. Ye cultura de prau, sesión vermú, baille, raigañu, electrónica, guitarrres, vinilos y comunidá.
Na so primer edición, El Condao foi epicentru d’una modernidá asturiana ensin complexos: tradición y esperimentación, folk y electrónica, lo de siempre y lo que ta por venir.
Lo que pasó ellí nun foi namás una fiesta.
Foi una escena naciendo.
Gijón Sound Festival x El Guateque de Vitorina
Gijón Sound Festival representa’l pulsu urbanu: la escena independiente, la ciudá como llaboratoriu creativu, los espacios en transformación y la programación con mirada propia.
El Guateque de Vitorina representa otra enerxía igual de necesaria: la del territoriu, la del espaciu compartíu, la de los llugares que nun precisen paecese a una capital pa ser contemporáneos.
Xuntos nun sumen namás un cartel.
Construyen un rellatu.
Un rellatu onde Asturies funciona como una área metropolitana emocional: costa, cuenca, ciudá, pueblu, industria, naturaleza y futuru coneutaos por una mesma idea.
La cultura nun ye un adornu.
Ye una infraestructura económica, social y emocional.
Mueve xente. Activa hostelería. Da vida a espacios históricos. Crea comunidá. Y fai que’l territoriu se mire a sí mesmu con más arguyu.
El cartel
Dear Joanne
Punk, garage rock, new wave y power pop con nerviu, estética marcada y un direutu que yá ta dando que falar.
Fueron una de les bandes más comentaes de la escena guitarrera nos últimos meses, con actuaciones destacaes xunto a La Femme en La Riviera, nel Cranc Illa de Menorca y nel Monkey Week.
El so soníu bebe del punk de la movida madrilana, con humor, surrealismu y enerxía pa sacudir cualquier escenariu.
Natalia Ferviú
Estilista, directora creativa, comunicadora, DJ y figura clave na interseición ente moda, cultura pop y música.
Con más de 15 años d’esperiencia en cabeceres como Vogue, Glamour o Rolling Stone, trabayó pa marques como Gucci, Givenchy o Dolce & Gabbana, pasó pola televisión y llegó a dirixir el so propiu programa: El Club de Radio 3.
Empezó pinchando na mítica sala Nasti y güei lleva a la cabina una mirada sofisticada, atrevida y fondamente pop.
La Viuda de Angelín
Ana y Ángel xúnense dende l’amor pola cumbia, la salsa y los guateques con sabor psicodélicu.
Vinilos, ritmos llatinos, destellos de los años 60 en adelante y una promesa clara:
el to cuerpu va acabar faciendo movimientos que nun sabíes que tenía guardaos.
Yo Somos
El power trío valencianu formáu por Quique Gallo, Xema Fuertes y Cayo Bellveser llega con canciones curties, lluminoses y directes al corazón.
Pop espontaneu, frescura, melodíes brillantes y esa sensación de que lo importante nun necesita artificiu.
Lo suyo ye la inmediatez. La canción que entra ensin pedir permisu. El contagiu feliz.
Stanley Brinks & Freschard
Stanley Brinks, conocíu primero como André Herman Düne, lleva décades grabando, collaborando y moviéndose ente escenes como l’antifolk neoyorquín, Berlín, The Wave Pictures y la canción independiente europea.
Freschard creció nuna granxa na Borgoña francesa, pasó por París, Nueva York y Berlín, y foi construyendo un universu propiu con guitarra, batería, flauta, washboard y una forma de cantar que convierte lo pequeñu en magnéticu.
Xuntos traen una manera de facer música que suena cercana, llibre y difícil d’encasillar.
Maribel & Sebastian
Dúo de DJs centraos na cultura pop, les “perversiones pop” y les versiones bailables d’artistes como Blur, Oasis o Blondie.
Nostalxa retro, escena indie, enerxía alternativa y munches ganes de convertir la tarde en pista.
Zahira & Los Rodríguez del Límite DJ
Zahira & Los Rodríguez del Límite súmense al cartel pa llevar el guateque a esi puntu onde’l baille dexa de ser una opción y empieza a ser una necesidá.
Esto nun ye namás un vermú
Ye una declaración.
Que la modernidá nun pertenez namás a la ciudá. Que los pueblos asturianos tamién son presente. Que la cultura pue ser motor de futuru. Que la cuenca, la costa y l’interior tienen muncho más que dicise.
Y que, cuando Asturies se xunta, pasen coses.
El 30 de mayu, La Pomarada vuelve sonar.
El Guateque de Vitorina x Gijón Sound Festival Sábadu 30 de mayu de 2026 La Pomarada · El Condao · Llaviana A partir de les 13:00 hores
ENTRAES
Ven al vermú que va facer historia.
10% de descuentu cola entrada del Guateque.
Hai escapades que nun precisen grandes planes.
Namás un sitiu guapu, aire llimpiu, naturaleza alredor y esi silenciu que nun se compra: siéntese.
Esti 30 de mayu, ven vivir El Guateque de Vitorina y completa la esperiencia quedándote nel Camping Municipal de Sobrescobio, nel corazón del Parque Natural de Redes.
Porque dempués d’un día de música, vermú, baille y celebración n’El Condao, nada presta más que siguir cerca del monte, del ríu y d’esa Asturies que se vive ensin correr.
Una opción perfecta pa disfrutar del Alto Nalón
El Camping Municipal de Sobrescobio ye ideal pa quien quier convertir el plan nun fin de selmana completu:
desconectar, dormir nel entornu natural, compartir tiempu con amigos y espertar al día siguiente cola montaña al llau.
La cuenca, la cultura y la naturaleza xúntense nuna mesma escapada.
Oferta especial pa asistentes
Aprovecha esta opción d’aloxamientu y fai que’l guateque nun acabe cuando pare la música.
Camping Municipal de Sobrescobio Entornu del Parque Natural de Redes Ideal pa asistentes a El Guateque de Vitorina Places llindaes
Reserva la to plaza y prepara la mochila.
El plan ye fácil:
música en La Pomarada, nueche nel camping y Asturies alredor.
Ven al guateque. Quédate na naturaleza.
Porque hai díes que se recuerden meyor cuando nun tienes priesa por volver.
Reserva y vive’l fin de selmana completu nel Alto Nalón.
Pa reservar mesa hai que llamar y facer la reserva nel restaurante Pomarada.
La comida va ser nel interior del restaurante y habrá que escoyer una hora ensin conocer entá los horarios concretos de los grupos.
Teléfonu: 985 614 049
Habrá menú de menestra y trucha / escalopinos, o tamién opción de comer a la carta.
Amás, durante tola tarde habrá un food truck con hamburgueses y dalguna cosa más.
Tamién nel bar d’enfrente tienen hamburgueses, pizzes, etc.
